شیطان کے معنے عربی زبان کے لحاظ سے حق سے دُور ہونے والے وجود کے ہیں

یا بدی میں ترقی کر جانے والے کےاور ابلیس ایسے وجود کو کہتے ہیں جو مایوس ہو جائے

میری تحقیق کے مطابق شیطا ن اور ابلیس ایک ایسے وجود کا بھی نام ہے

جسے خدا تعالیٰ نے انسانوں کے امتحان کیلئے ملائکہ کے مقابل میں رکھاہے

قرآن کریم میں ساعۃ کا لفظ صرف اُخروی قیامت کیلئے استعمال نہیں کیا گیا

بلکہ انبیاء کی جماعتوں کی ترقی اور اُن کے دشمنوں کی تباہی کیلئے بھی ساعۃ ، کا لفظ استعمال کیا گیا ہے

عیسائی حضرت مسیح کو غیر معمولی عظمت دیتے ہیں اور کہتے ہیں کہ اُن میںبعض اخلاق مخصوص طور پر پائے جاتے تھے

اس لئے اللہ تعالیٰ نے ان باتوں کو ردّ کیا ہے اور بتایا ہے کہ یہ ساری خوبیاں حضرت یحییٰ ؑ میں بھی پائی جاتی تھیں

ضروری نہیں کہ اس آیت کا مفہوم آخرت پر ہی چسپاں کیا جائےبلکہ شدید جنگوں یا زلزلوں میں بھی یہ حالت پیش آتی رہتی ہے

جب ضلع کانگڑہ میں1905ءکا زلزلہ آیا اس سے تیس ہزار کے قریب آدمی مر گئے تھے، گائوں کے گائوں اس طرح مٹ گئے کہ

ان کا نام و نشان نہ رہا ، پنجاب ایک سرے سے دوسرے سرے تک ہل گیا تو اُس وقت لوگوں کا بالکل یہی حال ہو ا تھا

اسکے دشمن بھی اس سے محبت کرتے تھے ،وہ رحم مجسم تھا، اس کی ڈھال پر ناجائز خون کا قطرہ نہ گراتھا،نہ بھیانک انتقام یاظلم سے

اُس نے ہاتھ رنگے ،اس نے کبھی شہر نہیں جلائے، مغلوب بادشاہوں کو پھانسی نہیں دی ، نہ اُس نے اسکندر کی طرح خونریزی کی

 اس نے لوگوں کے دل میں ایک پُر زور خواہش پیدا کردی تھی کہ وہ اُسے خوش رکھیں اور کہ وہ ہمیشہ ان پر حکومت کرتا رہاہے

بادشاہ خورس(Cyrus) یعنی ذوالقرنین کی امتیازی خصوصیات

میداور فارس کے بادشاہ خورس (Cyrus)کو اللہ تعالیٰ نے ذوالقرنین کانام دیا ہے

یہ بادشاہ قرآن کریم میں بیان فرمودہ صفات اپنے اندر رکھتا ہے اور یسعیاہ نبی کے کلام سے بھی اس امر کی تائید ہوتی ہے

ذو القرنین کے متعلق سیّدنا حضرت مصلح موعود رضی اللہ عنہ کی تحقیق

اس شخص کیلئے جو اپنے آپ کو عالم سمجھتا ہو نئی بات کو ماننا مشکل ہوتا ہے

کفار جن کے دل صاف تختی کی طرح تھے، وہ تو بہت جلد آپ پر ایمان لے آئے، مگر یہود و نصاریٰ جن کے پاس خدا کا کلام موجود تھا محروم رہے

موسوی قوم میں سے جو لوگ محمد رسول اللہ ﷺ کے وقت کو پائیں ، ان کیلئے محمد رسول اللہ صلی اللہ علیہ وآلہ وسلم کی اطاعت فرض ہے

اسی کی طررف حدیث میں ان الفاظ میں اشارہ ہے کہ

لَوْ کَانَ مُوْسٰی وَ عِیْسٰی حَیَّیْنِ لَمَا وَسِعَھُمَا اِلَّاتِّبَاعِی

اگر موسٰی اور عیسیٰ ؑبھی زندہ ہوتے تو وہ بھی میری پیروی کرتے

محمدیؐ کمالات کی بلندی کو موسوی کمالات نہیں پہنچ سکتے

حضرت موسٰی جلد سوال کرنے لگ جاتے اور رسول کریم صلی اللہ علیہ وسلم خاموش رہتے یہاں تک کہ اللہ تعالیٰ ہی آپؐپر ہر بات ظاہر کرتا اور یہی فرق دونوں کی امتوں میں تھا

سوائے آنحضرتﷺ کے کوئی کامل عبد نہیں ہے،اس نبی کے ذریعہ سے تم کو وہ علم عطا کیا گیا ہے جو اس سے پہلے کسی کو نہیں دیا گیا

 رسول کریم ﷺ کو دعا سکھائی گئی کہ قُلْ رَّبِّ زِدْنِيْ عِلْمًا یعنی اَے محمدﷺتُو اللہ تعالیٰ سے دعا کرتا رہا کر کہ الٰہی میرا علم اَور بڑھا

سونے کے کنگن پہنانے سے کیا مراد ہے؟

اگر تو اِس سے مراد دُنیا ہو تو اِس سے مرادیہ لی جائے گی کہ مسلمانوں کو بادشاہتیں ملیں گی

اگر اس سے مراد اگلا جہان ہو تو وہاں سونے کے کڑوں سے مادی سونے کے کڑے مراد نہیں ہو سکتے بلکہ خاص قسم کے اعزاز مراد لئے جائیں گے

مسیحی اقوام کی ترقی کے وقت ایک ایسی جماعت ہو گی جو اسلام پر قائم ہو گی اور ان کے ساتھ لوگوں کو ملنے کا حکم دیا گیا ہے

اس آیت کے مخاطب یقیناً وہ مسلمان ہیںجو اس زمانہ میں اسلام کی ترقی کو سیاسی اسباب کے ساتھ وابستہ قرار دیتے ہونگے

اللہ تعالیٰ فرماتا ہے کہ اس غلطی میں مبتلانہ ہونا بلکہ ان لوگوں کے ساتھ شامل ہوجانا جو صبح شام نمازوں میں دعائیں کررہے ہونگے

لمبے مصائب سے گھبرانا نہیں چاہئے ، ہم سے پہلے مسیحی جماعت کو تین سو نو سال تک دکھ دئیےگئے

لیکن انہوںنے صبر سے کام لیا اور آخر اس صبر کا نہایت شیریں پھل کھایا، پس تم کوجلدی نہیں کرنی چاہئے

بلکہ اپنے کام میں لگے رہنا چاہئے اور استقلال سے مصائب کا مقابلہ کرنا چاہئے

افسوس مسلمانوں نے یورپین اقوام کے مقابلہ پر بار بار جہاد کے اعلانات کر کے اسلام کے رعب کو مٹا دیا

جن خیر خواہوں نے ان کو اس قسم کی باتوں سےروکا ان کو اسلام کا دشمن قرار دیا

اور یہ نہ سمجھے کہ جو قرآن کریم کی تعلیم کی طرف بلاتے ہیں وہ اسلام کے دشمن نہیں

مسیحی قوم کی ابتداتو اس طرح ہوئی تھی کہ

وہ بت پرستی کے خلاف جہاد کرتے تھے اور شرک سے بچنے کیلئے انہوںنے صدیوں تک بڑی بڑی قربانیاں کیں

 لیکن انتہا اس طرح ہوئی ہے کہ اصلی دین کا کوئی نشان بھی اب مسیحیوں میں نہیں پایا جاتا

دنیا کی ہر چیز کوئی نہ کوئی فائدہ رکھتی ہے، کوئی بھی ایسی چیز نہیں جس میں کوئی فائدہ نہ ہو

افسوس کہ اس حکم سے مسلمانوں نے فائدہ اٹھانا چھوڑ دیا اور تحقیق اور ایجاد کے کام کو نظر انداز کر دیا

اور یورپ والوں نے باوجود قرآن کریم کو نہ ماننے کے اس حکم پر عمل کیا اور علوم میں اس قدر ترقی کی کہ ساری دنیا پر غالب آگئے

ہر جنس کے لوگوں کو ان کا ہم جنس ہی نجات دے سکتا ہے کیونکہ نمونہ وہی ہو سکتا ہے جو ان میں سے ہو

پس بشر کے سوا دوسری جنس بطور رسول انسانوں میں نہیں آسکتی کیونکہ وہ ان کیلئے نمونہ نہیں بن سکتی

يَسْــــَٔـلُوْنَكَ عَنِ الرُّوْحِ 

وہ تجھ سے رُوح کے متعلق سوال کرتے ہیں

یہ رُوح جس کے متعلق سوال کیا گیا ہے کیا چیزہے؟بعض نے اس سے جبرائیل مراد لیا ہے ،بعض نے قرآن کریم ، بعض نے

فرشتہ مراد لیا ہے،حضرت مولوی نور الدین صاحبؓروح کے معنی کلام الٰہی کیا کرتے تھے اور یہ معنی اوپر کے تمام معنوں سے اچھے ہیں

حضرت مسیح موعود ؑنے نہایت وضاحت سے اس آیت پر بحث کی ہے اور اس کے معنی انسانی روح ہی کے لئے ہیں٭

جَاۗءَ الْحَقُّ وَزَہَقَ الْبَاطِلُ۝۰ۭ اِنَّ الْبَاطِلَ كَانَ زَہُوْقًا

حق آگیا ہے اور باطل بھاگ گیا ہے اور باطل تو ہے ہی بھاگ جانے والا

جب مکہ فتح ہوا اور خانہ کعبہ میں رکھے ہوئے بتوں کو توڑ توڑ کر پھینکا گیا اس وقت رسول کریم صلی اللہ علیہ وسلم یہی آیت پڑھتے جاتے تھے

رسول کریم صلی اللہ علیہ وسلم کو یہ آیت پڑھتے دیکھ کر صحابہ کس طرح لہریں لے لے کر اس آیت کو پڑھتے ہوں گے

اور کس طرح ان کے ایمان ہر لحظہ اور ہر منٹ بڑھتے ہونگے اس کا اندازہ اصحاب ذوق ہی لگاسکتے ہیں

آنحضرت صلی اللہ علیہ وسلم نے فرمایا کہ نماز اپنے ربّ کی زیارت ہے

اور زیارت الٰہی ایک انعام ہے اور کوئی عقلمند انسان اپنے محبوب کی زیارت کو چٹی نہیں سمجھے گا

صبح کی نماز خاص طور پر اللہ تعالیٰ کے سامنے پیش کی جاتی ہے

اور خاص ہی طور سے مقبول ہوتی ہے کیونکہ اس وقت انسان میٹھی نیند چھوڑ کر اٹھتا ہے

بلا شبہ جو انسان صبح کی نماز پڑھے گا اگر اس نے وہ نماز ایمانداری سے پڑھی ہو گی تو باقی نمازیں بھی اس کیلئے آسان ہو جائیں گی

اللہ تعالیٰ نے سب انسانوں کو عزت بخشی ہے نہ کہ خاص اقوام کو پس قوموں کو ایک دوسرے پر تفاخر نہیں کرنا چاہئے

ابولہب کی بیوی کا قصہ محض خرافات ہے،خدا کا وہ رسولؐجو ساری دنیا سے نہ ڈرا
ایک کمزور عورت سے اس قدر خائف کیسے ہو سکتا ہے کہ اللہ تعالیٰ کو اسے غائب کرنا پڑا

دنیا کی ہر چیز مجموعی طور پر خدا کی تسبیح کرتی ہے اور فردًا فردًابھی خدا کی تسبیح کرتی ہے
ہر چیز میں خدا کی صفات کی جھلک ہے ، خدا کی ستاری ، غفاری،اسکی خلق، اسکی ملک ، وغیرہ تمام صفات ہر ایک چیز میں پائی جاتی ہیں

آج تک ایک شخص بھی دُنیا میں ایسا نہیں پیدا ہوا جس نے دعویٰ کیا ہو کہ مجھے ان بتوں کے ذریعہ سے خدا مل گیا ہے
اور وہ میری دعائیں سنتا اور قبول فرماتا ہے اور دنیا نے اس کی قبولیت دعا کے نشان دیکھے ہوں

متکبر یہ سمجھنے لگ جاتا ہے کہ مَیں نے انتہائی عروج پالیا ہے اور اس طرح وہ مزید ترقی سے محروم ہو جاتا ہے

پس تکبر نہ کر! اگر تیرے اندر کوئی دنیوی خوبی ہے تو اس کی مدد سے قوم کو فائدہ پہنچا تاکہ تُو قوم کا سرداربن جائے

اور اگر کوئی دینی خوبی ہے تو اس کے ذریعہ سے قوم کو فائدہ پہنچا تا کہ تُو خدا تعالیٰ کی نظر میں پسندیدہ ہو جائے

اگر کوئی کان دوسرے کی نسبت وہ بات سنے گا جسکے سننے کا اس کو حق نہ تھا اس پر بھی پرسش ہوگی

اگر آنگھ اس بات کو دیکھنے کی کوشش کرے گی جسکے دیکھنے کا اسکو حق نہیں تو اسکے بارہ میں بھی پرسش ہوگی

اگر کوئی دل ایسے خیالات رکھے گا جن کے رکھنے کا اسے حق نہیں تو اس کے متعلق بھی پرسش ہوگی

تفسیر کبیر از سیّدنا حضرت مصلح موعود رضی اللہ عنہ 

اس آیت میں اسلامی نظام کا ایک ایسا حکم بیان کیا گیا ہے جس میں اسلام دوسرے مذاہب سے ممتاز اور منفرد ہے

یتیموں سے حسن سلوک کا حکم تو سب مذاہب میں ملتا ہے

لیکن یہ حکم کہ اُن کے اموال کی حفاظت کرواور ان کو بڑھانے کی کوشش کرو کسی اور مذہب میں نہیں ملتا

قرآن کریم کی یہ بہت بڑی فضیلت ہے کہ وہ نہ صرف گناہ سے روکتا ہے بلکہ گناہ سے رکنے کے ذرائع بھی بتاتا ہے
جو کتاب گناہ سے بچنے کے ذرائع نہیں بتاتی وہ انسان کو ایک پریشانی میں مبتلا کر دیتی ہے
اطمینان وہی کتاب پیدا کر سکتی ہے جو کسی بات سے منع کرنے کے ساتھ ہی اُس سے بچنے کے ذرائع بھی بتا دے

بعض لوگ بخل کی وجہ سے اولاد کو پوری غذا نہیں دیتے یا ایسی غذا نہیں دیتے جو نشوو نما کیلئے ضروری ہومناسب لباس نہیں دیتے ، ایسا کرنا ان کو قتل کرنے کے مترادف ہے

بعض روپیہ کے خرچ کے ڈر سے اچھی تعلیم نہیں دلاتے اور گویا بچہ کی اخلاقی یا روحانی موت کا موجب ہو جاتے ہیں
اللہ تعالیٰ مومنوں کو نصیحت کرتا ہے کہ وہ اخراجات جو بچوں کی صحت اور اخلاق کی درستی کیلئے ضروری ہیں اُن سے کبھی دریغ نہ کیا کریں

ہر شخص کے مال میںاُس کے رشتہ داروں ، مساکین اور مسافروں کا حق ہے
کسی کا مال اس کا خالص مال نہیں ہوتابلکہ اس میں دوسروں کے حقوق شامل ہوتے ہیں

انبیاء کی جماعتوں کی ترقی اور ابتلاءیہ دوتوام بھائی ہیں جو ایک دوسرے سے جدا نہیں ہو سکتے

روزہ کا ایک روحانی فائدہ یہ ہے کہ انسان کا خدا تعالیٰ سے اعلیٰ درجہ کا اتصال ہو جاتا ہے

ہر شخص کے مال میں رشتہ داروں، مساکین اور مسافروں کا حق ہے آنحضرت صلی اللہ علیہ وسلم نے فرمایاکہ جب تم کسی بستی میں جائو تو تین دن تک کی ضیافت کا تم کو حق ہے اس حکم کو اگر دنیا میں جاری کیا جائے تو بہت سی خرابیاں جو ہوٹلوں اور سرائوں کی وجہ سے پیدا ہوئیہیں دنیا سے دور ہو جائیں

سب گناہ دراصل شرک ہی کی شاخیں ہیں گناہ کامرتکب انسان اسی لئے گناہ میں مبتلا ہوتا ہے کہ وہ خدا تعالیٰ کی ذات اور صفات پر کامل ایمان اور توکّل نہیں رکھتا توحید کا مسئلہ نیکیوں کیلئے بطور ایک بیج کے ہے، تمام مذاہب اور تمام اخلاق اسی مرکز کے گرد چکر لگا تے ہیں

شعراء کامقصد اورمدعایہی ہو تاہے کہ ہر خاص و عام ان سے خو ش ہو جائے اوران کے شعروں کی داد دے مگرمحمد رسول اللہ صلی اللہ علیہ وسلم نے تو سب دنیا کو اپنا مخالف بنالیا ہے

انسان بالعموم والدین کی ویسی خدمت نہیں کر سکتا ،جیسی کی ماں باپ نے اس کی بچپن میں کی تھی اس لئے فرمایا کہ ہمیشہ دعا کرتےرہنا کہ اَے خدا تُو ان پر رحم کر، تاکہ جو کسر عمل میں رہ جائے دعا سے پوری ہوجائے